Sonneveld Akademie bied gehalte-onderrig, met persoonlike aandag deur ‘n toegewyde personeelkorps, in afsonderlike klasse vir elke graad vanaf Graad RRR tot Graad 12. By Sonneveld Akademie ondersteun ons ‘n kennisgedrewe stelsel gebaseer op selfwerksaamheid waar aktiewe, kritiese en ondersoekende denke aangemoedig word. Derhalwe word klasse aangebied met die fokus op die ontwikkeling van 21ste-eeu- leervaardighede wat insluit, kreatiewe denke, kritiese denke, groepsvaardighede asook kommunikasievaardighede. Ten einde elke leerling die geleentheid te gee om tot sy/haar volle potensiaal te ontwikkel, word die klasse  tot nie meer as 25 leerlinge beperk. Tans is die “Kurrikulum Assesserings Beleidsverklaring” (CAPS) aanvaar as die skool se kurrikulum vir alle grade. Bykomend tot die betrokke kurrikulum word Bybelonderrig as vak aangebied en geassesseer soos in die Christelike etos van die skool vervat. Sonneveld Akademie is geregistreer en geakkrediteer as ‘n volwaardige onafhanklike skool en eksamensentrum van die Onafhanklike Eksamineringsraad (“IEB”), waarvan die hoë standaard wye internasionale erkenning geniet.

By Sonneveld Akademie ondersteun ons die beginsel van holistiese ontwikkeling van die kind en daarom is sport- en kultuuraktiwiteite integraal deel van die opvoedingsproses. Vir die veiligheid van u kind is daar ‘n naskoolsentrumdiens by die skool beskikbaar.

Saam met u, wil ons die geleentheid daar stel vir die holistiese ontwikkeling van u kind binne ‘n veilige en geborge omgewing. Daarom heg ons ook groot waarde aan ouerbetrokkenheid in die opvoedingsproses. Baie dankie dat u die tyd geneem het om hierdie inligtingstuk onder oë te neem. Kom kuier gerus by ons en ervaar wat ons u kind binne die raamwerk van ‘n baie bekostigbare private onderrigstelsel kan bied.

Baie welkom by Sonneveld Akademie.

Mnr. S.J. Weber

Skoolhoof